युवामा बढ्दो दुर्व्यसन रोक्न त्रिभुवन क्याम्पसमा सचेतना कार्यक्रम

२०८१ चैत्र २१, बिहीबार ,प्रकाशित
अनुमानित पढ्ने समय : 2 मिनेट

क्रान्ति अर्याल 
स्याङ्जा २१ चैत । हालका दिनमा युवाहरूमा लागू औषध दुरुपयोग र विभिन्न कुलतहरूमा फस्ने प्रवृत्ति बढ्दै गएको छ । यसले व्यक्तिगत जीवन मात्र होइन समाज र राष्ट्रकै भविष्यलाई प्रभावित पार्ने खतरा निम्त्याएको छ । यस्ता समस्याको न्यूनीकरण गर्नका लागि सचेतना अभिवृद्धि अति आवश्यक रहन्छ । यहि उद्देश्यका साथ त्रिभुवन आदर्श बहुमुखी क्याम्पसमा बुधबार एक विशेष सचेतना तथा परामर्श कार्यक्रम गरिएको छ ।

सामाजिक विकास कार्यालय स्याङ्जाको सहयोग, जीवन बाटिका नेपाल र स्वतन्त्र विद्यार्थी युनियनको संयुक्त आयोजनामा उक्त कार्यक्रम गरिएको थियो । उक्त कार्यक्रममा बोल्दै क्याम्पस प्रमुख अर्जुन बन्धु अर्यालले युवाहरू राष्ट्रको भविष्य भएकाले सही मार्ग अवलम्बन गर्नुपर्नेमा जोड दिनुभयो ।

त्यस्तै सामाजिक विकास कार्यालयका प्रमुख जीवन पौडेलले क्षणिक आनन्दका लागि दुर्व्यसनको बाटो रोज्न नहुने धारणा व्यक्त गर्नुभयो । स्वतन्त्र विद्यार्थी युनियनका सभापति देवदत्त सुवेदी गोपीले युवाहरू समाजका प्रेरणाका स्रोत हुनुपर्ने बताउनुभयो ।

यस्तै, मानसिक स्वास्थ्य काउन्सिलर रुमा प्रधानले तनाव व्यवस्थापन र सकारात्मक सोचको महत्त्वबारे सहजीकरण गर्नुभएको थियो । जीवन बाटिका नेपालका अध्यक्ष तथा प्रशिक्षक समिर गुरुङको अध्यक्षतामा सम्पन्न कार्यक्रममा सहायक प्रहरी निरीक्षक सुनिल वि।क। ले स्याङ्जामा लागू औषधको अवस्था र कानुनी व्यवस्थाबारे जानकारी दिनुभएको थियो ।

प्रतिक्रिया दिनुहोस

सम्बन्धित समाचार